Пӧртэм люкамъёсмы

Та бамын люкамын пӧртэмлыко удмурт кылын ужъёс

Горд палэзьлэсь

Сӥзьыл ке вуэ, нюлэс дуръёсын, сад-бакча котыръёсын, синмез гочатыса кадь, горд-горд пишто палэзь ӟускиос. Шӧмзыя соос пӧртэмесь луо. Кудӥз ческыталэс-чырс, мукетсэ ыме но поныны уг луы – сокем чырс. Озьы ке но, тросэз адямиос та нюлэс емышез шумпотыса толы дасяло. Угось горд палэзь туж узыр С витаминэн. Быгатӥсьёсыз солэсь пӧртэм сиёнъёс, юонъёс дасяло. Мон но туннэ тӥледлы дэмласько варенье, смоква, пастила пӧзьтыны.

Варенье. Кисьмам горд палэзез сузяно, миськоно, пӧзьтыны пононо быректэм вуэ но пӧзьтоно, небыт луытозяз. Нелькиськыны медаз шедьы. Вузэ кисьтоно. Палэзез сӥятыса, пӧлаз сироп ватсано (1 кг емышлы со мында ик сахар песок но 2 стакан ву). Эшшо пӧзьтоно на ляб тыл вылын, кӧня ке пол 3-4 час пала вис карылыса. Озьы палэзь пушкы ческытэз юнгес пыӵалоз, чырсэз быроз.

Пӧсьтэм вареньедэс кисьтэ фаянсовой тэркыосы но 10-12 час отын возе на, собере тыре банкаосы.

Смоква (палэзь кисаль). Сузям, миськем палэзьдэс, мискае поныса, бырем гуре яке духовкае 4-5 часлы парыны пуктэ. Небӟемез бере нельконо но шер пуж пыртӥ пызьыртоно. Собере сурано сахар песокен (1 кг палэзьлы сомында ик песок мынэ) но пӧзьтоно ляб тыл вылын напчытозяз. Медаз ӵуштаськы шуыса, ялан сурано.

Пӧзем мае тыроно вуэн коттэм фарфоровой тэркыосы, ӵошкытатоно. Собере пуктоно кӧс но шуныт азе. 2-3 нунал сылэм палэзь кисалез вандылоно 4 сэрего яке ромбен, вылтӥз пызьнано сахар пудра но тыроно пияла банкаосы. Пытсано пергамент бумагаен, интыяно юзмыт азе.

Пастила. Палэзез горшоке яке мискае поныса нельконо, пононо сахар песок, суралтоно но пуктоно бырем гуре. 3 час ёрос ортчыса, сое выльысь нельконо, суралтоно. Палэзезлэсь потэм вузэ кисьтыны уг яра. Пызьыртоно шерп уж пыртӥ, вӧлдоно пергамент бумагаен шобыртэм корт лист вылэ. Ӵошкытатыса пуктоно гуре (50-60 градуслэсь пӧсь медаз луы. 1 кг палэзьлы басьтоно 500 г песок).

Улон

Вордӥськем нуналысеныз адямиен ӵош луэ солэн анаез. Со сое яратэ ваньмызлэсь но золгес, уте сое, сюлмаське со понна

Анайлэн яратонэз туж но бадӟым. Со аслэсьтыз улонзэ пиналэз понна сётыны дась. Котькуд анайлы аслаз пиналэз туж дуно но мусо потэ.

Инкуазес но пичи нылпиосыз кадь ик утьыны кулэ: писпуос мерттоно, ӝагез октоно, пӧйшуръёсыз утёно.

Нош мар курадӟе асьме дунне вылын? Кӧня пӧйшуръёсыз быдтӥзы ини? Кӧня нюлэсъёс ӝуазы адями понна? Та ваньмыз инкуазьлы урод каре.

Котькуд пӧйшурлэн но, адямилэн кадь ик, анайзы вань. Нош дунне вылын вань сыӵе анайёс, кудъёсыз аслэсьтыз пиналъёссэ куштыса кельто. Кикы но аслэсьтыз пиоссэ куштэ. Сыӵе анайёсыз анай шуыны уг луы. Зэмос анай ноку но аслэсьтыз пиналзэ уз кушты, котьку но сое утёз, нокинлы но мыскылляны уз лэзьы.

Аслэсьтым малпанъёсмае быдэстэм потэ таӵе чуръёсын:

Котьку мед луоз инбам,

Котьку мед луоз шунды,

Котьку мед луоз анай,

Кутьку мед луоз нылпи.

Кытчы ышо удмуртъёс

Кытчы ышо удмуртъёс? Та юан монэ но сюлмаськытэ. Зэмзэ но, кытчы ышо удмуртъёс?

Удмурт калык-со туж вашкала калык. Та калыклы будыны кулэ, нош асьмеос ӧжытгес кылӥськом. Гуртысь пиналъёс али тросэз городэ кошкыны туртто. Городэ кошкыса, нылъёс бызё, пиос кышно басьто. Тросэз соос пӧлысь аслэсьтыз пиналъёссэ удмурт кыллы уг дышето ни. Озьы ик быре удмурт кыл.

Али асьмеос удмуртлыкмес выльысь улӟытыны кулэ, удмуртлы удмурт луоно, азинтоно кылмес но культурамес.

Добавить комментарий

Ваш e-mail не будет опубликован. Обязательные поля помечены *