Ӧрӟи карысь горд батыръёс (М. Прокопьевлы сӥзьыса)

Ӧрӟи карысь горд батыръёс

Ӧрӟи карысь горд батыръёс

Ваньзэ 35 ар улӥз Максим Прокопьевич Прокопьев. Гудыртӥз-чилектӥз, тӥни вань улэмез, но ӟеч ужъёсыз ноку но вунонтэм кылизы.

Удмурт калыклы со сыӵе ик данлыко герой, кызьы В.И. Чапаев ӟучъёслы, Н.А. Щорс украинъёслы, С.Г. Лазо молдаванъёслы, В.И. Киквидзе грузинъёслы, В.М. Азин латышъёслы, М. Вахитов бигеръёслы, Н.Н. Нариманов азербайджанъёслы, О.И. Городивонов калмыкъёслы…

Советской власть понна нюръяськонын дано герой луэмен ӵош ик М.П. Прокопьев – нырысетӥез удмурт писатель-коммунист. 1918 арын солэн «Максимлэн гожтэмез» кылбур бичетэз потиз (1979 арын со «Калык шорын» нимо бичетэн потэмын).

Максим Прокопьев вордӥськиз Татариысь Кукмор районэ пырись Нырья черкогуртын 1884 арын 17 (29) январе. Та гурт гордэн тодмостэмын Татарилэн политической мутусаз. Отын гожтэмын: «М.П. Прокопьевлэн – удмурт поэтлэн но политической ужасьлэн вордскем гуртэз».

Котыр улонысьтызы вань удмуртъёс сямен ик атаез, Прокопий Петрович, но анаез, Аграфена Васильевна, музъем ужаса улӥзы. Тямыс нылпи будэтӥзы соос. Тямысэз ик – Гавриил, Антон, Семён, Максим, Петр, Кузьма, Денис, Анна – быдэ вуэмзы бере калыклы тодмо адямиос луизы. Ньылетӥез пиез, Максим, нимысьтыз гажано, тужгес буре ваёно адями луиз.

Огазе жик-жик кариськод ке, ньӧръёсты но чигтыны уг луы, шуо. Бугырес улонысь сӥльтӧлъёслы ӧз сётӥське Прокопьевъёс но. Азьло быдэ вуиз Гавриил. Со Кузонысь инородческой дышетӥсьёслэсь семинаризэ йылпумъяз. Карлыганысь удмурт центральной школаын дышетыкуз Гавриил, бӧрсяз кыске Антон, Семен но Максим вынъёссэ. Озьы кылдӥз Максимлы шор ёзо школаын дышетсконы, вуоно революционерлы но писательлы улонын ас интызэ шедьтыны. Туж пайдаё луиз герман ож вакытэ Киевысь военной школаын дышетскемез но. Татын со рос-прос тодматскиз ож наукалэн историеныз но теориеныз. Фронтысен со большевикъёслэн партияз пырее но коммунист луэ.

Максим Прокопьев таӵе вамыш лэсьтыны дась вал эксэй армие басьтэмзылэсь азьло ик. Со Кузонысь дышетӥсьёсты дасясь семинариын дышетскыкуз революционной кружоке но революционной ужъёсы пыриське вал ини. Семинариез 1892 арын йылпумъяса, Уфа губерниысь Каймашабаш, Пермь губерниысь Канлы но Вылын Гондыр гуртъёсын дышетӥз. Трос ветлӥз удмурт, башкир, бигер гуртъёстӥ, адӟиз кайгуын но зӥбетын улӥсь калыкез. Соку солы калыкез курадӟонысь мозмытон, эксэйлы пумит безонтэм-люконтэм нюрьяськон мылкыд пыӵаз.

Герман ожысь Максим Прокопьев бертӥз 1917 арын сӥзьыл. Дораз вуэмез бере, ӝегатскытэк басьтӥськиз Советской властьлэсь вормонъёссэ ас калыкезлы мур пыӵатон борды. Трос пол урдӥськылӥзы со вылэ байёс но муллаос. Озьы ке но нюръяськись батырез ас улонэзлы быръем шонер сюрес вылысь кышкытъёс мозмытыны ӧз быгатэ.

1918 арын тулыс Кузонын властез киязы огдырлы басьтӥзы контрреволюционеръёс но белочехъёс-белогвардеецъёс. Ӵапак соку пеймыт гуосысьтызы йыръёссэс ӝутӥзы националистъёс. Соос кутӥзы ужпум Бигер-Башкир буржуазной республикаязы Урал гурезь но Волга шур котырысь ваньзэ тюрк но финно-угор калыкъёсты валчеян сярысь. Со пумысен вераськон дыръя, ӵектэм дэмланлы Максим Прокопьев меӵак пумит луиз. Со уго туж ӟеч тодэ вал В.И. Ленинлэн возьматэм сюресэзлэсь куштӥськон вуттоз быдэс даурлы берлань чигнамлы.

Соин ик Максим Прокопьев, аслыз тодмо луись удмурт большевикъёсын С.П. Барышниковен, И.П. Волковен, Т.К. Борисовен, С.И. Малыгинэн но аслыз тодмо луись мукет большевикъёсын кенешыса, ӝоген Москвае кошкиз.

Националистъёслэн ужъёссыя калык комиссариатлэн (Наркомнацлэн) ӵектэмезъя но Куинетӥ Всероссийской Советской кенешлэсь косэссэ быдэсъяса, 1918 арын июнь толэзе Елабугаын М.П. Прокопьев ортчытӥз быдэс Россиысь удмуртъёслэсь нырысетӥ кенешсэс. Татын со меӵак пыриськиз националистъёсын нюръяськонэ. Соос биниськемын вал Елабугаысь К.С. Яковлев эсэр котыре. Прокопьевлэн гуртысьтыз ик вал со. Эксэйлы пумит нюръяськонын куке но соос ог-огзылы матын вал. Нош та кенешын луизы лек тушмонъёс. Эксэй соку сэрпалтэмын вал. Татын верасько вал ини чылкак мукет ужпум сярысь: кинлы луоно кунын кузё – дасез вылын улӥсь узыръёслы-а, ваньбур поттӥсь калыклы-а? Максим Прокопьев удмурт калыкез ӧтиз начар улӥсьёс но большевикъёс пала луыны. Вятка, Пермь, Уфа но Казань губерниосысь  удмуртъёслэн делегатъёссы Прокопьев пала луизы но солы оскизы вань ужаса улӥсь удмуртъёслы азьветлӥсь луыны.

Быдэс Россияысь удмуртъёслэн нырысетӥ кенешсылэсь мылкыд каронзэ лыдэ басьтыса Наркомнац комиссариатын 1918 арын 31 июне кутӥз нимысьтыз кылкутос: «Национальностьлэн ужъёссыя Народной комиссариатэ кылдытӥське удмурт отдел. Отделлэн кивалтӥсез луыса юнматӥське П. Прокопьев».

Кузпалызлэн, Евгения Васильевна Прокопьевалэн, тодэ ваемэзъя, Максим Прокопьев шып улыны чидасьтэм, ужез яратӥсь, шуг но кышкыт учыръёсты сэртонэ-пертчонэ ӟырдыт пыриськись адями вылэм. В.И. Ленинлэн кивалтэмез улсын, Максим Прокопьев Москваын ВЦИКын ужа. Я.М. Свердловен но Ф.Э. Дзержинскоен пумиськыса-кенешыса, уката будэтэ аслэсьтыз тодон-валанзэ котькуд ласянь, тужгес но политика ласянь.

Колчакен сэрен кышкытлык кылдэмен, Максим Прокопьев, ас мылкыд каремезъя, вордӥськем палъёсаз бертэ, 2-тӥ армилэн чрезвычайной политической комиссарез луыса. Сарапулын тӧдьыосын сэрен югдур шуг луэмен, 1919 арын март толэзе Быдэс Россиысь удмуртъёслэсь кыкетӥ кенешсэ люка Нырьяла. Кенешлэн нимыныз со ӧте удмурт калыкез Советской власть палан юн сылыны. Та кенешез ортчытонын М. Прокопьевлы ӟеч юрттэт сёто Е.В. Прокопьева но В.Ф. Фадеев (Вильмон).

Максим Прокопьевлэн но Трофим Кузьмич Борисовлэн вазиськонзыя Сарапул уездысь комбедъёс, сютэм улӥсь Москвалы но Петроградлы туж трос нянь келяло. Ваньзэ удмуртъёслэсь келямын луэ 800000 пуд нянь. Нянен эшелон Москвае вуэм бере, Сарапул уездысь крестьянъёслэсь та патриотической ужзэс В.И. Ленин зэмос подвиг шуэ но ӟырдыт тау карон кылъёс вера.

Максим Прокопьевич военной ужез туж ӟеч валаменыз, ӝоген туж бадӟым осконэ пыре но, комиссар луэ данлыко 2-тӥ армиысь командиръёслы С.И. Гусевлы, Восточной фронтысь командующиезлы, В.И. Шоринлы 2-тӥ армилэн командующиезлы, П.К. Штенберглы, Реввоенсоветлэн членэзлы, М.М. Костеловскийлы, политотделлэн начальникезлы, дивизиослэн командиръёссылы В.М. Азинлы, Г.Н. Овчинниковлы, комиссаръёслы А.М. Лидэлы, Г.Н. Пылаевлы, Д.Ф. Зоринлы но мукетъёсызлы.

М. Прокопьев, Наркомнацысь чрезвычайной комиссар, 2-тӥ армилэн штабаз, политотделлэн удмурт секцияз, Колчаклы пумит нюръяськонын паймымон ужъёс лэсьтэ. Агитатор но трибун луэмен тужгес шуг учыръёсы ожмаськонэ одно ик ачиз пыра, удмуртъёсты организовать каре Колчаклы пумит нюръяськонэ. Ижевско-Воткинской дивизиез ёзна, пертче, тарка, ог уйскын 300 белогвардеецъёс гордъёс пала выжо (ваньмыз 1000-лэсь ятыр). Соин валче белогвардеец Юрьев, капитан, солдатъёстэк кыле, генерал Вербицкойлэн гордъёслы дасям шуккетэз куашка. Оже выль горд солдатъёсты дасян но дышетон, фронтлы но сютэм улӥсь городъёслы нянь дасян, комбедъёслэсь ужзэс азинтон, школаос усьтон, дышетӥсьёслы семинариос, политдышетсконъёс, семинаръёс, кенешъёс, конференциос ортчытян, газета, книгаос поттон но мукет ужъёс быдэсъясько М.П. Прокопьевлэн кивалтэм улсаз.

М.П. Прокопьев, удмурт калыклэн азьветлӥсез, 1919 арын 20 июне кузпалэзлы гожтэ: «Асьме фронтын ми пазьгимы Советской властьлэсь самой лек тушмонзэ, Европаысь но Америкаысь империалистъёслы вузаськем Колчак адмираллэсь кык сю иськемлэсь паськыт кыстӥськись андан кадь юн обороназэ. Пазьгимы но нажгатӥмы сое Вяткаысен Кам вылозь, ӝуась тэльёс-нюлэсъёс пыр…»

Максим Прокопьевичлы малпамъёссэ пумозяз вуттыны ӧз кылды. 1919 арын 30 июне уйын, ӟардон азьын солдатъёсыныз ӵош выже вао со Ирень шурез. Ярдурысен йыраз пуля йӧтэмен, бырыны шедиз. Максим Прокопьев бадӟым визьзэ, задор кужымзэ но ас улонзэ сётӥз Советской властез утён понна. Ас калыксэ, лул гажан удмуртъёсы шуиз. Сыӵе ик лул гажан мылкыдын нюръяськиз со асьме шаерысь вань калыкъёслэн эрикзы но ӟардон кадь пиштӥсь шудбуре улонзы понна. Озьы ик нюръяськиз со удмурт литература кылдытонын но.

Максим Прокопьевичлэн быремез юн шуккет луиз агай-вынъёслы, семьяезлы, сузэрезлы, удмурт но мукет калыкъёслы. Бен соос туж ӟеч тодӥзы Максим Прокопьевич зэмлык понна нюръяськиз, зэмлык понна улонзэ сётӥз шуыса. Максим Прокопьевич – дышетӥсь, поэт, герой, ноку но вунонтэм адями луыса кылиз.

Агай-вынъёс Петыр, Денис но сузэр Анна калыкын гажано адямиос вал, комбедлэн, яке колхозлэн кивалтӥсьёсыз луизы. Гавриил, Антон, Семён, Кузьма, Максим агай-вынъёс дышетӥсьёс луизы.

Кузьма Прокопьевич, Максим агаезлэсь кулэмзэ кылыса, Колчакен эшшо лек ожмаське, Кунгур городэз басьтыку, артнаступлениын быриз 1919 аре 30 июне.

Петр Прокопьевич Колчакез пазьгыса ожысь сӧсырмыса бертӥз но кема ӧз улы ини, 1924 арын кулӥз. Нырьялась комбедлэн кивалтӥсез луыса, нырысь Советской власть кылдыку.

Гавриил (1874-1946) но Антон (1880-1925) Прокопьевъёс Удмуртской Автономия кылдыку туж сӥё-дано дышетӥсьёс, зэмос агитатор но пропагандист, дышетонъя усто методистъёс вал ини. 1923 арын соос Москваын пӧртэм калыкъёс пӧлын ужась дышетӥсьёслэн кенешазы кыксы ик делегатъёс луизы, Гавриил Прокопьевичлы Удмурт Республика Ужысь Герой дано ним сётӥз.

Гаврииллэн но, Антонлэн но нылпиоссы быдэ вуыса, ваньзы сямен, дышетӥсьёс луизы.

Денис Прокопьевич (1895-1964) Быдӟым Отечественной война дырозь ас гуртаз «Заря» колхозын председатель луыса ужаз.

Анна Прокопьевна (1895-1945) война дыръя бускель «Горд Сяська» колхозын, бызем гуртаз, председатель вал.

Егор Петрович немец фашистъёсты войнаын герой сямен ӝугиз, трос правительственной наградаосын бертыса, пӧртэм партийно-хозяйственной ужъёсын ужа.

Евгения Васильевна Прокопьева (1885-1978) Максимлэн кузпалыз но самой матысь юрттӥсез, Удмурт Республикалэн заслуженной дышетӥсез дано ним басьтӥз. Аръёсыз туж секытесь ке но вал солэн, Евгения Васильевна пыриськиз пӧртэм мерлыко ужъёсы. Геннадий Максимович но Людмила Максимовна нылпиосыз кыксы ик ӵош дышетскыса йылпумъязы Савалийской гурт возёс техникумез. Собере кыксы ик ужало Ципья школаын. Геннадий Максимович гурт возёсъя дышетэ, Людмила Максимовна химиен но биологиен. Кыксы ик туж устоесь дышетӥсь луэмен, мерлыко ужъёсыз мылысь-кыдысь нуэменызы, премировать карыло но грамотаос сётъяло.

1929 арын Геннадий Максимович Ленинградысь гурт возёс институтэ пырее дышетскыны 3 курсаз. 1930 аре институтэз йылпумъяса вуэ Асановской гурт возёс техникуме дышетыны. Со инкуазез туж яратэ, усто дышетись луэ, туспуктон ужез но яратӥз. 1964 арын Асановской школаын дышетыкуз туберкулёзэн висьыса кулыны шеде.

1927-1928 аръёсы Людмила Максимовна пыре Кузонысь Восточной педагогической институтэ, химико-биологической факультетаз. Сое йылпумъяса, 1931-1941 аръёсы ужа Ципьялась шор ёзо школаын завуч луыса.

1941 арысен со Савальской школалэн директорез. 1951-1964 аръёсы Людмила Максимовна Красно-Полянской средней школаын химия но биология предметъёсын дышетэ, пришкольной участокен заведовать каре. Пенсие потэм бераз но Людмила Максимовна ужа пенсионеръёслэн кенешазы пӧртэм общественной ужъёсын. Умой дышетэмез но общественной ужъёсы мылысь-кыдысь пыремез понна сое Калык дышетонъя Министерство сӥё-дано каре пӧртэм наградаосын: коньдонэн, кузьымен, грамотаосын. 1966 арысен со улэ Ижевскын пересь анайзэ но внучкаоссэ утьыса.

Людмила Максимовналэн нылыз, Галя, юридической институтэз йылпумъя. Ижевскын специальной нылпиосын ужа.

Тӥни озьы учконо ке Максим Прокопьевичез, агай вынъёссэ, сузэрзэ но семьязэ – ваньзы соос зэмос ӧрӟи карысь горд батыръёс шуыны луэ. Кык юн сюлмо крестьянъёслэсь – Прокопий Петровичлэсь но Аграфена Васильевналэсь, кылдэм нылпиос одӥгез но анай-атайзылэсь данзэс ӧз ыштэ. «Таӵе выжыос сярысь нош ик книга гожтыны луоно», – шуэ Восточной фронтысь 2-тӥ армилэн «Кзыл крашче» газетлэн редакторез Ф.А. Таипов, 1918-тӥ арысен КПСС-лэн членэз.

Удмурт правительстволэн нырысетӥ кивалтӥсез, пересь большевик, И.А. Наговицын шуиз: «Удмурт калыклэн национальной самоопределенияз вотской ужъя М.П. Прокопьев пионер луэ, бадӟым политической деятель но просветитель. Удмуртиын Советской власть кылдытонъя одӥгез нырысез организаторъёс пӧлысь, гражданской войналэн героез»

 

Степанов Михаил Кириллович, Нырья, 1989 ар.

 

Ӝӧк сьӧр кырӟан

Укно выжиям гыле вань
Солэн шоръёсаз весе вань.
Тон доры уг лыкты, кытчы лыктом
Тон сяна мынам кинэ вань.
Липед вылад усеем лымыед
Вӧй толэзе шуналоз,
Аслад карыса улӥд ке
Ог кылыныз шуналод.
Анае гурзэ эстэм, дыр,
Мурётӥз ӵыныз потэ, дыр.
Гурзэ кыскыса шыдзэ пуктэм, дыр,
Нылъёсы бертоз шуыса.
Узы борылэн выжыяз
Выдыса сись вань меда,
Ӵукна вырӟыкум – ӝыт выдыкум
Милемыз сагынӥсь вань меда.
Бусыын сюрес туж трос,
Шонер кошкисяз пыроме.
Асьмелэн туганъёс туж трос,
Ӧтисез доры пыроме.
Сизьымо лампа югыт ӝуа,
Пӧлаз вӧйёсыз луиз ке,
Вордэм нылпие уз кушты али,
Пӧлаз визьёсыз луиз ке.
Сюмыс но тэля, сюмыс но сермет
Ӟеч валлэн вылаз мед посьтоз,
Ӟеч аныкайлэн нылыз-пиез
Ӟеч муртлэн синмаз мед йӧтоз.
Ой сур юоме, мусыр юоме,
Мусыр юо таос мед шуоз.
Урамтӥ ортчись ӟеч муртъёс
Туганэныз юо мед шуоз.
Тӥляд урамтӥд ортчон дыръям
Вылам канзолэ вал медам,
Тӥледын туган но ай луыны
Уин но вӧтам но вал медам.
Дӧдьые пукси усёнтэм
Ӟичы пась дӥсяй кынмонтэм,
Милям татын сием-юэм
Гумыре-дауре вунонтэм.
Азьяды керттэм ашетэд
Маръёслэсь но ярам пужыез,
Лыктэме тырысен учкисько
Маръёслэсь но ярам визьёсты.
Кырӟам ке ортчоз но ай гымырмы
Ӧм ке но ортчоз гымырмы,
Огмесыз-огмы кадырламы ке,
Ракатэн ортчоз гымырмы.
Тае уд юы, мае юод
Коняло-юмало шӧмыз вань,
Татчы уд лыкты, кытчы лыктод
Ӟеч мылзэ-кыдзэ сётӥсь вань.
Кызьы лыктӥды тӥ татчы
Такем но кезьыт буранэн,
Пумитады потыса ӧй ке басьтысал
Али ветлысалды урамын.
Гурезь но бордат узыед кисьма
Шунды шунытлы шум потыса,
Тӥ ӧтиды но ми лыктӥмы
Тӥляд ӧтемлы шум потыса,
Ойдо кыльтоез пыртоме
Икемез шулдыр кароме,
Ойдо кырӟаса юоме
Коркаез шулдыр кароме.
Та шыдэз-нянез кин пӧзьтӥз
Азь чиньыоссэ гылъяса,
Та шыдэз-нянез пӧзьтись мурт
Сюрс ар, сю ар мед улоз.
Улмопуосыд пересьмем
Вож улмооссэ будэтса,
Милям анаймы пересьмем
Нылзэ но пизэ будэтыса.
Шундыберганлэн сяськаез
Ноку но голькыт уз луы,
Ортчем но кошкем но пинал гымыр
Ноку но пинял уз луы.
Нэлыскын но эмезь кисьма, дыр
Кисьмамез музэ усе, дыр,
Азьла но улэм дыръёсмы
Али тодамы усе, дыр.

Солдат келян кый

Котырак узы но боры сяська
Кызьы лёгаса кошкоме,
Вордӥськем-будэм музъемысь
Кызьы люкиськыса кошкоме.
Бусы но капка, чильтэр капка
Картузэ кылиз гыдӟаса,
Картуз кылемлы уг бӧрдӥськы
Анае кылиз бӧрдыса.
Ошмес котырад быдэсак вож возь
Валдэс отчы лэзелэ,
Сагнон дыръям – мӧзмон дыръям
Салам гожтэт лэзелэ.
Йырсимы будыса вуиз лэся
Пуксем интыисен сынаны,
Милемлы врема вуиз лэся
Атыкай коркась потыны.

Ныл келян кый

Ай келямы ке, ай келялом
Бусы капкатӥ потытозь,
Ог ке но кошкиз, чаль уз берты
Учкомы сьӧрыз ышытозь.
Возь вылын сяська кызьы ӝужа
Озьы ӝужаськом ачимес,
Куакысь пушмульыез куртчыса люкиськом
Озьы люкиськом ачимес.
Пияла чарка, чын чарка
Тыгыляз-кошкиз адӟид-а?
Пинал даур – сӥзьыл нунал
Ортчиз-кошкиз шӧдӥд-а?
Огпол котыртӥ, кык пол котыртӥ
Кайран Кузмес урамез,
Огез ӧз кыльы, ваньмыз кылиз
Кайран шудон эшъёсы.
Ошмес дорын бадьпуэд
Уӵы-папа лыктыса кӧла, дыр.
Уӵы-папа луыса, кӧлай но меда
Анайлэн валем тышаказ.

Акашка кый (Паска)

Арскын но лыктэм турогоед
Бусы но шорын поръялоз,
Арскын но лыктэм Акашкаед
Баскись выжияд гырлалоз.
Апара-апара шуо вал
Татын но вылэм апара,
Акашка-Акашка шуо вал
Татын но вылэм Акашка.
Кызьпу но чурыт кораны
Вуэз но ческыт юыны,
Инмар кылчин гожтэм меда
Кулытозь валче улыны.
Улмо бакчае пырыса
Тӧдьы пӧзьы мон шедьтӥ,
Тӧдьы пӧзьы киез кынтэ
Ятысь музъем мӧзмытэ.
Кызьпу чурыт, кызьпу чурыт
Кызьы коралом ини,
Тӥ, эшъёсы, кылды небыт,
Кызьы люкиськом ини.

Ӝӧк сьӧр кырӟан

Ми лыктӥм татчы но вал улляса
Ӟускимы капка но выжыяд
Ми лыктон дыръя тӥ витиллямды
Ваёбыж сямен гырласа.
Ӝӧк вылад шормам шыдэт-нянед,
Чабейлэсь ӧвӧл вазьёслэсь,
Асьмелэн тазьы сием-юэм
Адямилэсь ӧвӧл Инмарлэсь.
Лыктэ пилемед, зоре куазед,
Зорсалке возьлэн кузяяз,
Асьмелэн тазьы сием-юэм
Кошкысал ке гумырлэн кузяяз.
Гырон гериедлэсь тэльбугозэ
Куиньметӥ чигытэк эн кушты,
Аскым кылытэк, муртлэсь кылыса
Эн кушты, туганэ, кулытозь.
Векчи но векчи виясьдэ
Кален но кален юоме,
Ум но мактаське, ум но курлаське
Валче но гинэ уломе.
Кенас азяд сюриед
Дыдык лыктыса мед пуксёз,
Ӝӧк вылад вӧлдэм тӧдьы ӝӧккышет
Берекет лыктыса мед пуксёз.
Укно азяд мыш умортоед
Арнялы кык пол мед палдоз,
Милемыз та быдӟа каремды понна
Инмармы кыктэм мед сётоз.
Милям атаймы тужу сто вал
Бусӥе потыса гырыны,
Атайлэсь усто ми луимы
Дасьсэ кырӟаса юыны.
Зарни луэме туж потэ,
Азвесь луэме нош потэ,
Аслам лыктэме туж потэ,
Аслам ӧтеме нош потэ.
Паськыт возьёсыз турнан дыръя
Ӧй шедьты бакра сяськаез,
Сион-юонын уно ветлӥ
Ӧй шедьты тӥ кадь туганэз.
Оти ортчыку пыр туган
Тати ортчыку пыр туган.
Тон ӧд ке пыры, мон пыро
Ини ачимес ог туган.
Сьӧд нюлэс шоры сайкос сайки
Выль сайкос медло шуыса.
Тӥлесьтыд нылдэс кенлы басьтӥм
Выль туган медло шуыса.
Сизьымо лампа – сизьымо пельта
Ӝуа, дыр, бӧлем урдэскын.
Сизьым пол сайкай – сизьым пол малпай
Сӥзьыл уйшор вадескын.
Пышлэсь пызэрзэ ми басьтӥм
Ог йырзэ музэ лёгытэк,
Ми анай дорын улӥмы
Одӥг секыт кыл кылытэк.
Ой шунды одӥг, толэзь одӥг
Ачимеос, туганъёс, туж уно,
Ваньдэсыз одӥгак ӧтьысал но
Уг луы черод вуттэме.

Сюан кый (вӧй юон)

Жингыр но жингыр ми лыктӥм,
Йускимы укно выжыяд.
Ми лыктон дыръя тӥ витиллямды,
Лыз дыдык сямен гырласа.
Векчи но векчи куазед но зоре,
Пыӵатоз меда узьымлы,
Ӧтьыса ваем куномес,
Быгатом меда сектаны.
Кыскамы понэм кутомы,
Сюзёз но меда дымыны,
Сётэм кубодэс нуллыны,
Сюзёз но меда кальёсмы.
Тыпылэсь кубо ми лэсьтӥм,
Мертчан черсыны мед яроз,
Нылмес Тӥледлы сётӥськом,
Семья карыны мед яроз.
Сандык пыдэсын алача кесэк,
Дэрем тыр ӧвӧл, сайес тыр.
Ятэ ке потӥд, малпаса поты,
Арнлялы ӧвӧл — гумырлы.
Бизьыса потӥ ураме,
Ог улмо лыктэ тыгляса.
Тӥ но эн басьтэ, ми но ум басьтэ.
Куспамы дышмон медаз пыр.
Паськыт Камъёсыз пураны,
Куаслэсь но векчи пыж кулэ,
Ятлэсь семьязэ кыйланы,
Буртчинлэсь но небыт кыл кулэ.
Сьӧд нюлэс сьӧръёсын маръёс вань,
Лымылэсь кезьыт ошмес вань.
Ят анай дорын маръёс вань,
Бодылэсь чурыт кылъёс вань.
Сугонлэсь курытсэ котьношкин тодэ,
Озьы но сугонэз пуктӥськом.
Ят дорын улонэз котьношкин тодэ.
Озьы но ятэ потӥськом.
Ойдо асьмес ял каром,
Бадӟым кузьпулэн салкымаз.
Ойдо асьмес тау каром,
Ӟеч туганлэн пыд азяз.
Тау кариськомы шудэтлы,
Йыбыртӥськомы пыд азяд.
Бӧдёно сямен шыр ӟыргаса,
Шудды мед лыктоз пумитяд.
Кыӵе артана шуисьёслы,
Кызьпу артана шуэлэ.
Сектазы шуыса юасьёслы,
Туж сектазы шуыса вералэ.
Паськыт Каме ӵӧжме лэзи,
Быгатоз меда уяны.
Вордэм нылмес Тӥледлы сётӥм,
Быгатоз меда улыны.
Ӟиӟег куарнянь, чабей куарнянь,
Бугыртонъёсыз кызьы луоз.
Ми сиыса-юыса кошкиськомы,
Берыктонъёсыз кызьы луоз.

Урам кый

Йырлӥй башлӥм, йырлӥй башлӥм,
Кӧтарып зибарыгыз.
Авыр сызлар ишыртсагыз
Ыткарып зибарыгыз.
Вань вал ветлон дыръёсмы но,
Паськыт урам йоскыт вал,
Паськыт урамез, дыр, сэзъяса,
Ветлон дыръёсмы но вал.
Чиге сюлмы, чиге сюлмы,
Чиге пинал сюлэмы.
Сюлэм чигеме уг тырмы,
Куасьме чыжыт бамъёсы.
Вия, вия льӧмпу сяська,
Виям интыяз льӧм потэ.
Ортче-кошке пинал даур,
Сюлмез-кӧтэз позыртэ.
Музӥган кыл 12 вылэм,
Лыдӟим ке но, ӧм ке но.
Ортче вылэм пинал гымыр,
Шудӥт ке но, ӧд ке но.
Тальян гармон биграк матур,
Басмей тылляр аӵылмей,
Бызнын йыраглар, яшь йыраг,
Быр йырламей басылмей.
Шуды эше музӥгандэ,
Тон ик чебер шудӥськод.
Мынэсьтым ӝуась сюлэмъёсме,
Тон ик каньыл кариськод.
Уно ветлӥ, уно утчай,
Пуксён инты ӧй шедьты.
Уно ветлӥ, уно утчай,
Тон каигзэ ӧй шедьты.
Тӥни очи поезд лыктэ,
Ӵынзэ шуккиз бамъёсам,
Бӧрдӥсько но ӵушылӥсько
Тӧдьы кышет пумъёсам.

Ойдо эшъёс луоме

Ойдо эшъёс луоме но,
Кыре потыса шудоме.
Верась муртъёс мед вералозы
Кылымтэ амал луоме.
Улмо басьтом, валче сиём,
Дунзэ шори тӧлялом.
Шудӥмы ке, валче шудом,
Ӧске шудыны ум потэ.

Кырӟан

Кырӟан поштӥ, кырӟан кутски,
Ӝутыса тӥ лэзелэ.
Секыт кылъёс кылӥды ке,
Ортчытыса лэзелэ.
Тальян музган сокем чебер,
Нюрттэк кыйез уг поты.
Милям сюлэм, пинал сюлэм
Кырӟатэк со уг тӧзы.